ನವದೆಹಲಿ: ತಾಂತ್ರಿಕ ಅವಿಷ್ಕಾರಗಳು ಮುಂದುವರೆದಂತೆ ಅದೆಷ್ಟೋ ಆ್ಯಪ್ ಗಳ ರಚನೆಯಾಗಿದೆ. ಸೋಷಿಯಲ್ ಮೀಡಿಯಾ ಹವಾ ಜೋರಾದಂತೆ ಎಲ್ಲರೂ ಜರ್ನಲಿಸ್ಟ್ ಗಳಾಗುತ್ತಿದ್ದಾರೆ. ಅದರಂತೆ ಅದೆಷ್ಟೋ ಸುಳ್ಳು ಸುದ್ದಿ ಹರಡುವ, ಕೋಮುವಾದಕ್ಕೆ ಪ್ರಚೋದಿಸುವ ಇನ್ನೂ ಅನೇಕ ಕೆಟ್ಟ ಉದ್ದೇಶಗಳೊಂದಿಗೆ ಕೆಲವು ಯೂಟ್ಯೂಬ್ ಚಾನೆಲ್ ಗಳು ಕಾರ್ಯ ನಿರ್ವಹಿಸುತ್ತಿದೆ. ಅದಕ್ಕೆ ಇದೀಗ ಸರ್ಕಾರ ಡಿಜಿಟಲ್ ಸ್ಟ್ರೈಕ್ ಮಾಡಿದೆ. ಸುಳ್ಳು ಸುದ್ದಿಗಳಿಗೆ ಕಡಿವಾಣ ಹಾಕಲು ಕೇಂದ್ರದ ಮೋದಿ ಸರ್ಕಾರ ಡಿಜಿಟಲ್ ಸ್ಟ್ರೈಕ್ ಆರಂಭಿಸಿದೆ. 120 ಕ್ಕೂ ಹೆಚ್ಚು ವದಂತಿಗಳನ್ನು ಹರಡುವ ಯೂಟ್ಯೂಬ್ ಚಾನೆಲ್‌ಗಳನ್ನು ನಿಷೇಧಿಸಲಾಗಿದೆ.
ವರದಿಯ ಪ್ರಕಾರ, ಈ ಯೂಟ್ಯೂಬ್ ಚಾನೆಲ್‌ಗಳು ಕ್ಲಿಕ್‌ಬೈಟ್ ಥಂಬ್‌ನೇಲ್‌ಗಳನ್ನು ಇರಿಸುವ ಮೂಲಕ ನಕಲಿ ಸುದ್ದಿಗಳನ್ನು ಚಲಾಯಿಸುತ್ತಿದ್ದವು. ಇದೇ ವೇಳೆ, 2024 ರ ಲೋಕಸಭಾ ಚುನಾವಣೆಯ ಮೊದಲು ಭಾರತದಲ್ಲಿ ನಕಲಿ ಸುದ್ದಿ ಮತ್ತು ವದಂತಿಗಳನ್ನು ಹರಡುವ ಚಾನಲ್‌ಗಳು ಮತ್ತು ವಿಷಯಗಳ ವಿರುದ್ಧ ಗೂಗಲ್ ಕಟ್ಟುನಿಟ್ಟನ್ನು ತೋರಿಸಿದೆ. ಇಂತಹ ನಕಲಿ ಸುದ್ದಿ ವಾಹಿನಿಗಳು ಮತ್ತು ವಿಷಯಗಳ ವಿರುದ್ಧ ಕ್ರಮ ಕೈಗೊಳ್ಳಲು ಯೂಟ್ಯೂಬ್ ಇಂಡಿಯಾ ಕೂಡ ಸಿದ್ಧತೆ ಆರಂಭಿಸಿದೆ. ಈ ಹಿಂದೆಯೂ ಇಂತಹ ಸುಳ್ಳು ವದಂತಿಗಳನ್ನು ಹರಡುವ ಯೂಟ್ಯೂಬ್ ಚಾನೆಲ್‌ಗಳ ವಿರುದ್ಧ ಸರ್ಕಾರ ಕ್ರಮ ಕೈಗೊಂಡಿತ್ತು.
