ಕಾರ್ಕಳ/ಹೆಬ್ರಿ, ಮೇ.13: ಬಿರುಗಾಳಿ ಸಹಿತ ಮುಂಗಾರುಪೂರ್ವ ಮಳೆಯ ರೌದ್ರಾವತಾರಕ್ಕೆ ಕಾರ್ಕಳ ಹೆಬ್ರಿ ತಾಲೂಕಿನಲ್ಲಿ ಬಹುತೇಕ ಕಡೆಗಳಲ್ಲಿ ಭಾರೀ ಹಾನಿ ಸಂಭವಿಸಿದೆ. ಮಂಗಳವಾರ ರಾತ್ರಿ 9 ಗಂಟೆ ಸುಮಾರಿಗೆ ಗುಡುಗುಸಹಿತ ಮಳೆ ಹಾಗೂ ಭಾರೀ ಬಿರುಗಾಳಿಗೆ ಹೆಬ್ರಿ ಹಾಗೂ ಅಜೆಕಾರು ಪರಿಸರದಲ್ಲಿ ಸುಮಾರು 100ಕ್ಕೂ ಅಧಿಕ ವಿದ್ಯುತ್ ಕಂಬಗಳು ತುಂಡಾಗಿದ್ದು, ಸುಮಾರು 35 ಲಕ್ಷ ಮಿಕ್ಕಿ ನಷ್ಟ ಸಂಭವಿಸಿದೆ. ಭೀಕರ ಬಿರುಗಾಳಿ ಮಳೆಯಿಂದ ಮರ ಉರುಳಿ ಹಲವೆಡೆ ಮನೆಗಳಿಗೂ ಹಾನಿಯಾಗಿದೆ.
ಬಿರುಗಾಳಿಯ ಜೊತೆಗೆ ಭಾರೀ ಮಳೆ ಸುರಿದ ಪರಿಣಾಮ ಮರಗಳು ವಿದ್ಯುತ್ ಲೈನ್ ಮೇಲೆ ಬಿದ್ದು ಕಂಬಗಳು ತುಂಡಾಗಿ ಬಹುತೇಕ ಕಡೆಗಳಲ್ಲಿ ವಿದ್ಯುತ್ ವ್ಯತ್ಯಯವಾಗಿದೆ.
ಹೆಬ್ರಿ ತಾಲೂಕಿನ ನಾಡ್ಪಾಲು, ಬೇಳಂಜೆ, ಮುದ್ರಾಡಿ, ಸೋಮೇಶ್ವರ, ಜಕ್ಕನಮಕ್ಕಿ, ಕನ್ಯಾನ, ಹೆಬ್ರಿ ಪರಿಸರದಲ್ಲಿ ಹಾಗೂ ಕಾರ್ಕಳ ತಾಲೂಕಿನ ಅಜೆಕಾರು ಪ್ರದೇಶಗಳಲ್ಲಿ ಒಟ್ಟು 100ಕ್ಕೂ ಅಧಿಕ ವಿದ್ಯುತ್ ಕಂಬಗಳು ಹಾಗೂ ಹಲವು ವಿದ್ಯುತ್ ಟ್ರಾನ್ಸ್ಫಾರ್ಮರ್ ಸಹಿತ ಧರೆಗುರುಳಿ ಅಪಾರ ನಷ್ಟ ಸಂಭವಿಸಿದೆ. ಹೆಬ್ರಿಯ ತಾಲೂಕು ಕಚೇರಿ ಕಟ್ಟಡದ ಮೇಲ್ಛಾವಣಿ ಹೆಂಚುಗಳು ಹಾರಿ ಹೋಗಿದ್ದು, ಅಜೆಕಾರು ಪೇಟೆಯಲ್ಲಿ ತೆಂಗಿನ ಮರವೊಂದು ವಾಣಿಜ್ಯ ಸಂಕೀರ್ಣದ ಕಟ್ಟಡದ ಮಹಡಿಯ ಮೇಲೆ ಬಿದ್ದು ಹಾನಿ ಸಂಭವಿಸಿದೆ.
ಮರ್ಣೆ ಗ್ರಾಮದ ಗುಡ್ಡೆಯಂಗಡಿ ಬಂಗ್ಲೆಗುಡ್ಡೆ ಆನಂದ ಕೊರಗ ಹಾಗೂ ಬಸವರಾಜ ಎಂಬವರ ಮನೆಯ ಹೆಂಚು ಹಾರಿ 7 ಸಾವಿರ ನಷ್ಟ ಸಂಭವಿಸಿದೆ. ಅಜೆಕಾರು ದೆಪ್ಪುತ್ತೆಯ ಸುಜಾತ ಹಾಗೂ ಅಮ್ಮಣ ಎಂಬವರ ಮನೆಗೆ ಮರಬಿದ್ದು 11 ಸಿಮೆಂಟ್ ಶೀಟ್ ತುಂಡಾಗಿ ಸುಮಾರು 20 ಸಾವಿರ ನಷ್ಟ, ಅಜೆಕಾರು ಗಣೇಶ್ ಜೋಗಿ ಎಂಬವರ ಮನೆಯ ಹೆಂಚು ಹಾಗೂ ಸಿಮೆಂಟ್ ಶೀಟ್ ಪುಡಿಯಾಗಿದ್ದು 8 ಸಾವಿರ ನಷ್ಟ, ಕಾಡುಹೊಳೆ ನಂದಾರು ಸೀತಾ ಆಚಾರ್ಯ ಎಂಬವರ ಮನೆಯ ಹೆಂಚು ಹಾಗೂ ಶೀಟ್ ಗಾಳಿಗೆ ಹಾರಿದ್ದು 15 ಸಾವಿರ ನಷ್ಟ,ಕಡ್ತಲ ಗ್ರಾಮದ ಕಂಬಳಗುಡ್ಡೆ ನಿವಾಸಿ ಕುಸುಮ ಎಂಬವರ ಮನೆಗೆ ಮರಬಿದ್ದು 8 ಸಾವಿರ ನಷ್ಟ ಸಂಭವಿಸಿದೆ.
ಹೆಬ್ರಿ ಉಪ ವಿಭಾಗದ ಬಹುತೇಕ ಪ್ರದೇಶಗಳಲ್ಲಿ ಬಿರುಗಾಳಿಯಿಂದ ಕಂಬಗಳು ಮುರಿದಿದ್ದು, ಈಗಾಗಲೇ ಮುರಿದ ಕಂಬಗಳನ್ನು ತೆರವುಗೊಳಿಸಿ ಹೊಸ ಕಂಬಗಳನ್ನು ಅಳವಡಿಸುವ ಕಾರ್ಯ ಭರದಿಂದ ಸಾಗಿದೆ. ವಿದ್ಯುತ್ ಲೈನ್ ದುರಸ್ತಿಗೆ 5 ತಂಡಗಳನ್ನು ನಿಯೋಜಿಸಲಾಗಿದ್ದು, ಇಂದು ಹಾಗೂ ನಾಳೆಯೊಳಗೆ ವಿದ್ಯುತ್ ಪೂರೈಕೆ ಮರುಸ್ಥಾಪಿಸಲಾಗುತ್ತದೆ ಎಂದು ಹೆಬ್ರಿ ಮೆಸ್ಕಾಂ ಉಪವಿಭಾಗದ ಸಹಾಯಕ ಇಂಜಿನಿಯರ್ ನಾಗರಾಜ ತಿಳಿಸಿದ್ದಾರೆ.
.
.
.
.
.
.
.
.
.
.
.
.
.
.
.
.
.
.
.
.
