ಅಜೆಕಾರು ಬಾಲಕೃಷ್ಣ ಪೂಜಾರಿ ಕೊಲೆ ಪ್ರಕರಣ : ಆರೋಪಿ ಪತ್ನಿ ಪ್ರತಿಮಾಳ ಜಾಮೀನು ಅರ್ಜಿ ವಜಾ: ಪ್ರಿಯಕರ ದಿಲೀಪ್ ಹೆಗ್ಡೆ ಜತೆಗೆ ರೀಲ್ಸ್ ರಾಣಿಗೆ ಜೈಲೇ ಗತಿ

ಕಾರ್ಕಳ: ಕಳೆದ 2024ರ ಅಕ್ಟೋಬರ್ 20 ರಂದು ಪ್ರಿಯತಮನ‌ ಜತೆ ಸೇರಿ ತನ್ನ ಪತಿಯನ್ನೇ ಕೊಂದು ಜೈಲು ಸೇರಿದ್ದ ಕೊಲೆಗಾತಿ ಪತ್ನಿ ಜೈಲಿನಿಂದ ಹೊರಬರಲು ಜಾಮೀನು ಅರ್ಜಿ ಸಲ್ಲಿಸಿದ್ದು,ಈಕೆಯ ಅರ್ಜಿಯನ್ನು ಉಡುಪಿ ಜಿಲ್ಲಾ ಸೆಷನ್ಸ್ ನ್ಯಾಯಾಲಯವು ವಜಾಗೊಳಿಸಿದೆ.
ಅಜೆಕಾರು ದೆಪ್ಪುತ್ತೆಯ ನಿವಾಸಿ ಬಾಲಕೃಷ್ಣ ಪೂಜಾರಿಗೆ ಆತನ ಪತ್ನಿ ಪ್ರತಿಮಾ ಪೂಜಾರಿ ಹಾಗೂ ಆಕೆಯ ಲವರ್ ದಿಲೀಪ್ ಹೆಗ್ಡೆ ಸೇರಿ ಆಹಾರದ ನಿಧಾನ ವಿಷ ಬೆರೆಸಿ ಕೊಲ್ಲುವ ಭಯಾನಕ ಸಂಚು ರೂಪಿಸಿದ್ದರು ‌ ಆದರೆ ಗ್ರಹಚಾರ ಕೆಟ್ಟ ಪರಿಣಾಮ ಇವರಿಬ್ಬರ ಖತರ್ನಾಕ್ ತಂತ್ರ ಕೈಕೊಟ್ಟಿತ್ತು, ಸಕಾಲದಲ್ಲಿ ಆತನ ಸಹೋದರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಿದ್ದ ಹಿನ್ನೆಲೆಯಲ್ಲಿ ಚೇತರಿಸಿಕೊಳ್ಳುತ್ತಿದ್ದ ಪತಿ ಬಾಲಕೃಷ್ಣ ಪೂಜಾರಿಯನ್ನು ಬದುಕಲು ಅವಕಾಶ ನೀಡದೇ ಆಸ್ಪತ್ರೆಯಿಂದ ಬಲವಂತವಾಗಿ ಮನೆಗೆ ಕರೆದುಕೊಂಡು ಬಂದ ಪ್ರತಿಮಾ ತನ್ನ ಲವರ್ ಜತೆ ಸೇರಿ ನಡುರಾತ್ರಿಯೇ ಅಸಹಾಯಕ ಸ್ಥಿತಿಯಲ್ಲಿದ್ದ ಪತಿಯನ್ನು ಉಸಿರುಗಟ್ಟಿಸಿ ಹತ್ಯೆಗೈದಿದ್ದರು.

ಈ ಪ್ರಕರಣ ನಡೆದು ಬರೋಬ್ಬರಿ 5 ತಿಂಗಳು ಕಳೆದಿದ್ದು, ಇದೀಗ ಈ ಪ್ರಕರಣದ ಪ್ರಮುಖ ಆರೋಪಿ ಮೃತರ ಪತ್ನಿ ಪ್ರತಿಮಾ ಪೂಜಾರಿ ಸಲ್ಲಿಸಿದ್ದ ಜಾಮೀನು ಅರ್ಜಿಯನ್ನು ಎರಡನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯ ಉಡುಪಿ ಸಂಚಾರಿ ಪೀಠ ವಜಾಗೊಳಿಸಿ ಆದೇಶ ಹೊರಡಿಸಿದೆ.
ಪ್ರಕರಣದ ಎ2 ಆರೋಪಿ ಪ್ರತಿಮಾಳ ಪ್ರಿಯಕರ ಹಿರ್ಗಾನ ಗ್ರಾಮದ ದಿಲೀಪ್ ಹೆಗ್ಡೆ ಈ ಹಿಂದೆ ಜಾಮೀನಿಗೆ ಅರ್ಜಿ ಸಲ್ಲಿಸಿದ್ದು ಅದು ಕೂಡ ವಜಾಗೊಂಡಿತ್ತು.ಇದೀಗ ಎ 1 ಆರೋಪಿ ಪ್ರತಿಮಾ ಪೂಜಾರಿಯ ಜಾಮೀನು ಅರ್ಜಿಯು ಕೂಡ ವಜಾಗೊಂಡಿದ್ದು ಒಬ್ಬರಿಗೂ ಮತ್ತೆ ಜೈಲೇ ಗತಿ ಎಂಬಂತಾಗಿದೆ.