ನವದೆಹಲಿ,ಜು.28: ದೇಶದಲ್ಲಿ ಪ್ರಾಯೋಗಿಕವಾಗಿ ಪಾಲಿಮರ್ ಕರೆನ್ಸಿ ನೋಟುಗಳನ್ನು ಚಲಾವಣೆಗೆ ತರುವ ಪ್ರಸ್ತಾಪಕ್ಕೆ ಕೇಂದ್ರ ಸರ್ಕಾರ ಅನುಮೋದನೆ ನೀಡಿದೆ. 10 ರೂಪಾಯಿ ಮತ್ತು 20 ರೂಪಾಯಿ ಮುಖಬೆಲೆಯ ತಲಾ 100 ಕೋಟಿ ಪಾಲಿಮರ್ ನೋಟುಗಳ ಫೀಲ್ಡ್ ಟ್ರಯಲ್ ಗೆ ಅನುಮೋದನೆ ನೀಡಲಾಗಿದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯ ಸೋಮವಾರ ಸಂಸತ್ತಿಗೆ ಮಾಹಿತಿ ನೀಡಿದೆ.
ಈ ಪ್ರಾಯೋಗಿಕ ಚಲಾವಣೆ ಯಶಸ್ವಿಯಾದ ನಂತರ ಈ ಎರಡು ಮುಖಬೆಲೆಗಳಲ್ಲಿ ನಿಯಮಿತವಾಗಿ ಪ್ಲಾಸ್ಟಿಕ್ ನೋಟುಗಳನ್ನು ಬಿಡುಗಡೆ ಮಾಡಲು ಆರ್ಬಿಐ ಯೋಜಿಸಿದೆ.ಹಿಂದೆ 2014ರಲ್ಲಿ ಮೈಸೂರು, ಕೊಚ್ಚಿ, ಜೈಪುರ ಸೇರಿದಂತೆ ಐದು ನಗರಗಳಲ್ಲಿ ಈ ಯೋಜನೆ ಕೈಗೆತ್ತಿಕೊಳ್ಳಲು ನಿರ್ಧರಿಸಿ ನಂತರ ಕೈಬಿಡಲಾಗಿತ್ತು. ಕಾಗದದ ನೋಟುಗಳಿಗೆ ಹೋಲಿಸಿದರೆ ಪಾಲಿಮರ್ ನೋಟುಗಳು ಹೆಚ್ಚು ಕಾಲ ಬಾಳಿಕೆ ಬರುತ್ತವೆ ಹಾಗೂ ಹರಿಯುವುದು, ಕೊಳೆಯಾಗುವುದು ಮತ್ತು ತೇವಾಂಶಕ್ಕೆ ಹಾಳಾಗುವುದು ಕಡಿಮೆಯಿರುತ್ತದೆ.
ಜೊತೆಗೆ ಕೃತಕ ಕಾಗದದ ಕಳ್ಳನೋಟುಗಳ ಹಾವಳಿ ತಡೆಯಲು ಇದು ನೆರವಾಗಲಿದೆ. ಇತ್ತೀಚಿನ ದಿನಗಳಲ್ಲಿ ಡಿಜಿಟಲ್ ಪಾವತಿ ಹೆಚ್ಚಾಗಿದ್ದರೂ, ಸಣ್ಣ ಮೌಲ್ಯದ ನೋಟುಗಳ ಬೇಡಿಕೆ ಗಣನೀಯವಾಗಿ ಏರಿಕೆಯಾಗಿದೆ. ಪ್ರಸ್ತುತ ಚಲಾವಣೆಯಲ್ಲಿರುವ ಕಾಗದದ ನೋಟುಗಳನ್ನು ಸಂಪೂರ್ಣವಾಗಿ ಹಿಂಪಡೆಯಲಾಗುವುದಿಲ್ಲ, ಬದಲಾಗಿ ಕಾಗದದ ನೋಟುಗಳ ಜೊತೆಜೊತೆಗೇ ಈ ಪ್ಲಾಸ್ಟಿಕ್ ನೋಟುಗಳನ್ನೂ ಬಳಸಲಾಗುತ್ತದೆ.
.
.
.
.
.
.
.
.
.
.
.
.
.
.
.
.
.
.
.
.
