ಬೆಂಗಳೂರು, ಅ.21: ಅಪ್ರಾಪ್ತ ವಯಸ್ಕ ಮಗನಿಗೆ ಕಾರು ಚಲಾಯಿಸಲು ಅವಕಾಶ ನೀಡಿದ ಪರಿಣಾಮವಾಗಿ ಆತನ ಅತಿವೇಗದ ಚಾಲನೆಯಿಂದ ನಡೆದ ಭೀಕರ ಅಪಘಾತದಲ್ಲಿ ಒಂದೇ ಕುಟುಂಬದ ಮೂವರು ಮೃತಪಟ್ಟ ಪ್ರಕರಣದಲ್ಲಿ ಬಾಲಕನ ತಂದೆ ನದೀಮ್-ಉರ್-ರೆಹಮಾನ್ ವಿರುದ್ಧ ದಾಖಲಾಗಿದ್ದ ಕೊಲೆಯಲ್ಲದ ಅಪರಾಧಿಕ ನರಹತ್ಯೆ ಆರೋಪವನ್ನು ರದ್ದುಗೊಳಿಸಲು ಕರ್ನಾಟಕ ಹೈಕೋರ್ಟ್ ಸ್ಪಷ್ಟವಾಗಿ ನಿರಾಕರಿಸಿದೆ. ಅಲ್ಲದೇ ಅಪ್ರಾಪ್ತರ ಕೈಗೆ ಕಾರಿನ ಸ್ಟೀರಿಂಗ್ ಕೊಟ್ಟು ಸಂಭವಿಸುವ ದುರಂತಗಳಿಗೆ ಪೋಷಕರೇ ಹೊಣೆಗಾರರಾಗಿದ್ದು, ಜವಾಬ್ದಾರಿಯಿಂದ ನುಣುಚಿಕೊಳ್ಳಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ಕಟುವಾಗಿ ಎಚ್ಚರಿಸಿದೆ.
ಏನಿದು ಪ್ರಕರಣ?
ಕಳೆದ 2020ರ ಡಿಸೆಂಬರ್ 10ರಂದು ಮೈಸೂರು-ಬೆಂಗಳೂರು ಹೆದ್ದಾರಿಯಲ್ಲಿ ನದೀಮ್ ಉರ್ ರೆಹಮಾನ್ ಅವರ 14 ವರ್ಷದ ಅಪ್ರಾಪ್ತ ವಯಸ್ಸಿನ ಮಗ ಫೋಕ್ಸ್ವ್ಯಾಗನ್ ವೆಂಟೋ ಕಾರನ್ನು ಚಲಾಯಿಸಿಕೊಂಡು ಹೋಗಿ ದ್ವಿಚಕ್ರ ವಾಹನಕ್ಕೆ ಬಲವಾಗಿ ಡಿಕ್ಕಿ ಹೊಡೆದಿದ್ದ. ಈ ಭೀಕರ ಅಪಘಾತದಲ್ಲಿ ಬೈಕ್‌ನಲ್ಲಿದ್ದ ಒಂದೇ ಕುಟುಂಬದ ಮೂವರು ಮೃತಪಟ್ಟು, ಮತ್ತೊಬ್ಬರು ಗಂಭೀರವಾಗಿ ಗಾಯಗೊಂಡಿದ್ದರು. ಈ ಪ್ರಕರಣದ ಆರಂಭಿಕ ಹಂತದಲ್ಲಿ ಪೊಲೀಸರು ಅಜಾಗರೂಕ ಚಾಲನೆ ಮತ್ತು ನಿರ್ಲಕ್ಷ್ಯದಿಂದ ಸಾವು ಉಂಟುಮಾಡಿದ ಪ್ರಕರಣ ದಾಖಲಿಸಿಕೊಂಡಿದ್ದರು. ಆದರೆ, ತನಿಖೆಯ ವೇಳೆ ತಂದೆಯೇ ಮಗನಿಗೆ ಕಾರು ಚಲಾಯಿಸಲು ನಿರಂತರವಾಗಿ ಅವಕಾಶ ನೀಡುತ್ತಿದ್ದುದು ಮತ್ತು ಅಪಘಾತದ ದಿನವೂ ಸ್ವತಃ ತಾನೇ ಕಾರಿನ ಕೀ ನೀಡಿರುವುದು ತನಿಖೆಯಲ್ಲಿ ಕಂಡುಬAದ ಹಿನ್ನೆಲೆಯಲ್ಲಿ, ಐಪಿಸಿ ಸೆಕ್ಷನ್ 304 ಭಾಗ-2 (ಕೊಲೆಯಲ್ಲದ ಅಪರಾಧಿಕ ನರಹತ್ಯೆ) ಅಡಿಯಲ್ಲಿ ತಂದೆಯನ್ನೂ ಎರಡನೇ ಆರೋಪಿಯನ್ನಾಗಿ ಸೇರಿಸಿ ದೋಷಾರೋಪ ಪಟ್ಟಿ ಸಲ್ಲಿಸಲಾಗಿತ್ತು. ಸೆಷನ್ಸ್ ನ್ಯಾಯಾಲಯವು ಆರೋಪಮುಕ್ತಗೊಳಿಸುವ ಅರ್ಜಿಯನ್ನು ತಿರಸ್ಕರಿಸಿದ ನಂತರ, ಅರ್ಜಿದಾರರು ಹೈಕೋರ್ಟ್ ಮೆಟ್ಟಿಲೇರಿದ್ದರು.
ಹೈಕೋರ್ಟಿನಲ್ಲಿ ಸಲ್ಲಿಕೆಯಾಗಿದ್ದ ಈ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರಿದ್ದ ಏಕಸದಸ್ಯ ಪೀಠವು, ಪ್ರಕರಣದಲ್ಲಿ ಕೇವಲ ಮೂವರು ಮೃತಪಟ್ಟಿದ್ದಾರೆ ಎಂಬ ಕಾರಣಕ್ಕೆ ಸೆಕ್ಷನ್ 304 ಭಾಗ-2 ಅನ್ವಯಿಸುವುದಿಲ್ಲ, ಆದರೆ ತಂದೆಯು ಅಪಾಯದ ಅರಿವಿದ್ದರೂ ಮಗನಿಗೆ ವಾಹನ ನೀಡಿದ್ದಾರೆಯೇ ಎಂಬುದು ನ್ಯಾಯಾಂಗ ವಿಚಾರಣೆಯಲ್ಲಿ ಸಾಕ್ಷ್ಯಾಧಾರಗಳ ಮೂಲಕ ಸಾಬೀತಾಗಬೇಕಿದೆ ಎಂದು ಸ್ಪಷ್ಟಪಡಿಸಿತು. ತಂದೆಯು ‘ಮಗ ತನ್ನ ಗಮನಕ್ಕೆ ಬಾರದಂತೆ ಕಾರು ತೆಗೆದುಕೊಂಡು ಹೋಗಿದ್ದ’ ಎಂದು ವಾದಿಸುತ್ತಿದ್ದರೆ, ಪ್ರಾಸಿಕ್ಯೂಷನ್ ‘ತಂದೆಯೇ ಕೀ ಕೊಟ್ಟಿದ್ದರು’ ಎಂದು ಹೇಳುತ್ತಿದೆ. ಇಂತಹ ಭಿನ್ನ ಹೇಳಿಕೆಗಳನ್ನು ವಿಚಾರಣೆಯ ಮುನ್ನವೇ ನಿರ್ಧರಿಸಲು ಸಾಧ್ಯವಿಲ್ಲ, ಆದ್ದರಿಂದ ಆರೋಪವು ಸಾಕ್ಷ್ಯಗಳ ಪರೀಕ್ಷೆಯನ್ನು ಎದುರಿಸಬೇಕೇ ಹೊರತು ಆರಂಭದಲ್ಲೇ ರದ್ದುಗೊಳಿಸಲು ಸಾಧ್ಯವಿಲ್ಲ ಎಂದು ಹೈಕೋರ್ಟ್ ಹೇಳಿತು.
ಅಪ್ರಾಪ್ತರು ವಾಹನ ಚಲಾಯಿಸುವುದರಿಂದ ಸಾರ್ವಜನಿಕ ರಸ್ತೆಗಳಲ್ಲಿ ಸೃಷ್ಟಿಯಾಗುತ್ತಿರುವ ಅಪಾಯಗಳ ಬಗ್ಗೆ ಆತಂಕ ವ್ಯಕ್ತಪಡಿಸಿದ ನ್ಯಾಯಪೀಠ, 2025-26ನೇ ಸಾಲಿನಲ್ಲಿ ದೇಶಾದ್ಯಂತ ನಡೆದ 11,890 ಅಪ್ರಾಪ್ತರ ಅಪಘಾತಗಳಲ್ಲಿ ಕರ್ನಾಟಕದಲ್ಲೇ ಬರೋಬ್ಬರಿ 751 ಪ್ರಕರಣಗಳು ದಾಖಲಾಗಿರುವುದನ್ನು ಉಲ್ಲೇಖಿಸಿತು. ಮೋಟಾರು ವಾಹನದ ಸ್ಟೀರಿಂಗ್ ಮಕ್ಕಳ ಕೈಯಲ್ಲಿ ಆಟದ ವಸ್ತುವಾಗಬಾರದು ಎಂದು ಎಚ್ಚರಿಸಿದ ಪೀಠ, ಅರ್ಜಿಯನ್ನು ವಜಾಗೊಳಿಸಿ ಆದೇಶಿಸಿತು.
ಪ್ರಕರಣದಲ್ಲಿ ಅರ್ಜಿದಾರರ ಪರವಾಗಿ ವಕೀಲ ಪಲ್ಲವ ಆರ್. ವಾದ ಮಂಡಿಸಿದರೆ, ಸರ್ಕಾರದ ಪರವಾಗಿ ವಿಶೇಷ ಪಬ್ಲಿಕ್ ಪ್ರಾಸಿಕ್ಯೂಟರ್ ಬಿ.ಎನ್. ಜಗದೀಶ ವಾದ ಮಂಡಿಸಿದ್ದರು.
ಪೋಷಕರ ಜವಾಬ್ದಾರಿಯ ಬಗ್ಗೆ ಹೈಕೋರ್ಟ್ ಖಡಕ್ ಮಾತು:
ಕಾನೂನಿನ ಬಗ್ಗೆ ಗೊತ್ತಿದ್ದರೂ ಕೂಡ ಮಗುವಿನ ಕೈಗೆ ವಾಹನದ ಸ್ಟೀರಿಂಗ್ ಕೊಡುವ ಪೋಷಕರು, ಆ ದುಸ್ಸಾಹಸವು ದುರಂತದಲ್ಲಿ ಅಂತ್ಯಗೊAಡಾಗ ಮಗುವಿನ ವಯಸ್ಸಿನ ನೆಪವೊಡ್ಡಿ ಹೊಣೆಗಾರಿಕೆಯಿಂದ ತಪ್ಪಿಸಿಕೊಳ್ಳಲು ಸಾಧ್ಯವಿಲ್ಲ. ಪೋಷಕತ್ವ ಎಂದರೆ ಕೇವಲ ಪ್ರೀತಿ ಮತ್ತು ಅಧಿಕಾರವಲ್ಲ, ಅದೊಂದು ಗುರುತರ ಜವಾಬ್ದಾರಿಯೂ ಹೌದು. ಸಾರ್ವಜನಿಕ ರಸ್ತೆಗಳು ಎಲ್ಲರಿಗೂ ಸೇರಿದ ಸಮಾನ ತಾಣಗಳೇ ಹೊರತು, ಇಂತಹ ಕಾನೂನುಬಾಹಿರ ಹುಚ್ಚಾಟಗಳಿಗೆ ತರಬೇತಿ ಮೈದಾನಗಳಲ್ಲ,” ಎಂದು ಹೈಕೋರ್ಟ್ ಕಟುವಾಗಿ ಅಭಿಪ್ರಾಯಪಟ್ಟಿದೆ.
.
.
.
.
.
.
.
.
.
.
.
.
.
.
.
.
.
.
.
.
